Лазат Нуркожоеванын колун сураган жигиттин камактагы мөөнөтү узарды
Президенттин карындашы Лазат Нуркожоеванын колун сураган Афтандил Сабырбековдун камактагы мөөнөтү 2 айга узарды. Маалыматты редакцияга Биринчи Май райондук сотунан билдиришти.
Белгилүү болгондой, Биринчи Май райондук соту 30-июлда ИИМдин Тергөө кызматынын тергөөчүсүнүн өтүнүчүн канааттандырып, Афтандил Сабырбеков менен анын бир тууганы Тариэл Сабырбековдун камактагы мөөнөтүн узартты. Соттун токтомуна ылайык, алар 3-октябрга чейин камакта болот.
Эске салсак, Афтандил Сабырбеков 5-июль күнү милиция кызматкерлери тарабынан баңгизатын жасап, тараткан деген шек менен кармалган. Биринчи Май райондук сотунун 6-июлдагы чечими менен Сабырбеков 3-августка чейин СИЗОго киргизилген.
Президенттин басма сөз катчысы Аскат Алагөзов Лазат Нуркожреванын жигити ырасында эле укук коргоо органдары тарабынан кармалганын ЖМКга тастыктап, "жигиттин башкы максаты - өзүнүн мыйзамсыз иш-аракеттерин жашыруу үчүн жогорку бийликтегилерден калкалоочу адамдарды ("крыша") табуу болгон", деп билдирген.
Андан кийин Афтандил Сабырбековдун бир тууганы Тариэль да кармалып, 3-августка чейин камакка алынганы маалым болгон.
