Кара-Кулжада сел алып кеткен унаадагылар бир үй-бүлө мүчөлөрү болушкан. Жаңы жагдайлар
Ош облусунун Кара-Кулжа районунда 30-июнда сел жүрүп, унааны агызып кеткен. Унаанын ичиндеги 3 адам каза болуп, бир адам куткарылып, дагы бирөө изделип жатканын ӨКМдан маалымдашкан.
Сел суусу агызып кеткен жарандар боюнча Ош облустук ички иштер башкармалыгынан кошумча маалымат беришти.
Текшерүүнүн жүрүшүндө Daewoo Matiz унаасын башкарып бараткан Кара-Кулжа районунун 1988-жылы туулган тургуну А.Р. экени, жанында жубайы 1990-жылы туулган Ж. кызы А., уулдары 2012-жылы туулган Р. уулу Р., 2020-жылы туулган Р. уулу Н. жана 2016-жылы туулган Р. кызы А`ны сел агызып кеткендиги такталган.
Куткаруучулар менен биргеликте жүргүзүлгөн издөө иш-чараларынын натыйжасында унаадагы 3 адамдын жансыз денеси табылып, жакын туугандарынын өткөрүлүп берилди.
Ал эми аман калган 8 жаштагы Р. кызы А. Кара-Кулжа райондук ооруканасына жеткирилип, медициналык жардам көрсөтүлдү.
Учурда жеринде Кара-Кулжа РИИБдин өздүк курамы, ИИМдин Күзөт кызматы, жергиликтүү тургундар, ардагерлер жана кошумча күчтөр дайынсыз болуп жаткан Р. уулу Н`ны издеп табуу, селдин кесепетинен жабыр тарткан жагдайларды калыбына келтирүү боюнча иш-чараларды жүргүзүүдө.
Облустук башкармалыктан белгилешкендей, каза болгон 36 жаштагы А.Р. ИИМдин Күзѳт кызматынын кызматкери болгон.
