СИЗОго камакка алынгандардын жакындары президент менен жолугушууну талап кылышты
СИЗОдо отурган активисттер, саясатчылар жана журналисттердин жакындары президент Садыр Жапаров менен жолугушуу талабын айтып, өкмөт үйүнө барышты.
Алар президентке маалымат жетпей жатат деп эсептешет.
"Аялдарды колдоо керек. Алардын апасы, бир туугандары, кыздары бар. Биз Садыр Жапаров менен жолугушууну суранабыз жана талап кылабыз. Биз бул жакка эне катары келдик. Садыр Жапаров 5-10 мүнөткө болсо да чыгып же бизди кабыл алып, сүйлөшүшү керек", - дешет топтолгондор.
Бирок өкмөт үйүнөн чыккан өкүл учурда президент иш сапар менен Баткен облусунда жүргөнүн, ал курулуп жаткан үйлөр менен таанышып жатканын айтты.
Эске салсак, 23-октябрда опозиция саясатчылары, активисттер коомдук баш аламандыкты жаратууга шектелип кармалган. Андан бир күн мурун Кемпир-Абад суу сактагычын колдоо боюнча комитет түзүлгөн.
27-октябрда кармалган активисттер соттун чечими менен эки айга СИЗОго киргизилген. Кийин алардын камактагы мөөнөтү узартылып, айрымдары ачкачылык жарыялашкан.
