"Чыр-чатак чыгып бычак сайган". Күйөөсүн өлтүрүүгө шектелген аял кармалды
Кемин районунда күйөөсүн өлтүрүүгө шектүү аял кармалды.
27-июнунда Кемин РИИБдин нөөмөт бөлүмүнө үйлөрдүн биринин короосунда эркек кишинин сөөгү табылгандыгы тууралуу маалымат түшкөн.
Милиция кызматкерлери айтылган короодо 1984-жылы туулган Н.А.нын жансыз денесин табышкан. Сыртынан кароо жүргүзүүдө маркум күч колдонуп өлтүрүлгөндүгү аныкталган.
Жүргүзүлгөн ыкчам-издөө иш-чараларынын жүрүшүндө бул кылмышка шектелип, 1982-жылы туулган А.С. кармалып, убактылуу кармоочу жайга киргизилген. Ал маркумдун аялы экени аныкталган.
Тергөөнүн алдын ала версиясы боюнча, жубайлардын ортосундагы чыр-чатак чыгып, анын натыйжасында аялы күйөөсүн бычак менен сайып салган.
Бул факты КР Кылмыш-жаза кодексинин 122-беренеси (Адам өлтүрүү) боюнча катталган.Учурда бардык керектүү экспертизалар дайындалды. Сотко чейинки териштирүүлөр уланууда.
