Башка сайттан алынып чыгарылган маалымат үчүн Kaktus.media'га кылмыш иши козголду
Бишкектин Биринчи май районунун прокуратурасы Кыргыз Республикасынын Кылмыш-жаза кодексинин "Согушту пропагандалоо, башкача айтканда бир өлкөнүн башка өлкөгө агрессиясын жаратуу же согуштук жаңжалды баштоо максатында көз караштарды, идеяларды же чакырыктарды ар кандай формада жайылтуу" 407-беренеси боюнча Kaktus.media редакциясына кылмыш ишин козгоду. Бул тууралуу Генералдык прокуратуранын басма сөз кызматы билдирди.
Белгилей кетсек, Кылмыш-жаза кодексинин бул беренеси иш жүзүндө буга чейин эч качан колдонулган эмес.
"2022-жылдын 27-январында Kaktus.media чек арадагы куралдуу конфликт боюнча макала жарыялаган. Макалада Кыргыз Республикасынын аскери биринчи ок атып Тажик Республикасын жооп кайтарууга аргасыз кылган деген чындыкка дал келбеген маалымат камтылган", - деп билдирүүдө жазылган.
Учурда борбор шаардык прокуратура бул иш аракеттердин мыйзамдуулугу боюнча иштерди жүргүзүп жатат.
31-январда редакциянын бир нече кызматкери суракка чакыртылган. Алар маалыматты жайылтпоо боюнча тил катына кол коюшту.
Эске салсак, 28-январда Kaktus.media сайтынын редакциясынын алдында кыргыз-тажик чек арасындагы конфликттин чагылдырышына нааразы болгондор чогулушкан. Бир күн мурун редакция ASIA-Plus тажик басылмасына шилтеме берип жаңылык чыгарган. Анын максаты тажик тарап болуп жаткан окуялар боюнча өз элине кандай маалымат берип жаткандыгын көрсөтүү. Кийин редакция түшүндүрмө берип мындай позициясын негиздеген.
