Чек ара кызматы: кыргыз жоокерлерине тажик чек арачылары кол салышты
Мамлекеттик чек аранын кыргыз-тажик тилкесинде Кыргызстан менен Тажикстандын чек ара бөлүмдөрүнүн аскер кызматкерлеринин ортосунда ок атышуу болду. Бул маалыматты Мамлекеттик чек ара кызматынын басма сөз кызматы расмий тастыктады.
"Кыргыз Республикасынын Улуттук коопсуздук мамлекеттик комитетинин чек ара кызматынын атчан чек ара отряды кыргыз-тажик чек арасында Баткен облусунун Лейлек районундагы Наумин ашуусу аймагында кызмат өтөгөн. Берилген маршрут боюнча , Чашмагилдан ашуусунун аймагында Кыргыз Республикасынын Улуттук коопсуздук мамлекеттик комитетинин чек ара күзөт отряды күтүүсүздөн Тажикстандын чек арачылары тарабынан кол салууга дуушар болушкан", - деп билдирди министрлик.
Чыр-чатактын курмандыктары боюнча маалыматтар такталууда.
Белгилүү болгондой, КР УКМКнын Баткен облусу боюнча башкармалыгынын чек ара кызматы бөлүмүнүн башчысы, полковник Кыялбек Төлөнбаев жана коопсуздук органдарынын жетекчилери окуя болгон жерге себептерин жана шарттарын билүү үчүн барышкан.Тараптардын чек ара өкүлдөрү бул фактыны териштирип жатышат.
Башкы беттеги сүрөт иллюстрациялык мүнөздө.
