Арстанбаптагы селге байланыштуу кылмыш иши козголду
Жалал-Абад облусунун Базар-Коргон районунун прокуратурасы тарабынан Арстанбап айылындагы селдин себептери жана шарттары боюнча текшерүү иштери жүргүзүлдү. Текшерүүнүн жүрүшүндө жергиликтүү чиновниктер тарабынан мыйзам бузуу аныкталган дешет Башкы прокуратурадан.
Андагы маалыматка караганда, Базар-Коргон шаар куруу жана архитектура башкармалыгынын, Арстанбап айыл өкмөтүнүн жана "Кадастр" мамлекеттик мекемесинин Базар-Коргон филиалынын кызмат адамдары тарабынан 2006-2019-жылдар аралыгында суу коргоо зонасында жайгашкан 15 жер тилкеси мыйзамсыз жеке менчикке берилип кеткендиги аныкталган. Андан соң Арстанбап-Сай дарыясынын жээгинде бир катар соода объектилери курулган.
Белгилесек, ушул жылдын 23-июлунда катталган селден Арстанбап-Сай дарыясында суунун деңгээли көтөрүлүп, анын кесепетинен ички чарбалык жолдордо сел жүрүп, имараттарды, соода объектилерди жана турак жайларды сел каптап, аймакта өзгөчө кырдаал абалы түзүлгөн.
"Базар-Коргон шаар куруу жана архитектура башкармалыгынын, Арстанбап айыл өкмөтүнүн жана "Кадастр" Мамлекеттик мекемесинин Базар-Коргон филиалынын кызмат адамдарынын мыйзамсыз аракеттеринин натыйжасында мамлекетке жана жеке жактарга 24 миллион сомдон ашык зыян келтирилген", - деп айтылат маалыматта.
Текшерүүнүн жыйынтыгы менен Базар-Коргон районунун прокуратурасы тарабынан Кылмыш-жаза кодексинин 337-беренеси (Кызмат абалынан кыянаттык менен пайдалануу) негизинде кылмыш иши козголду. Учурда тергөө иштери жүрүүдө.
