Бишкектеги балдар клиникасында ири өлчөмдө дары-дармек уурдалган
Бишкек шаарындагы балдар клиникаларынын биринде күчтүү дары-дармектер уурдалган. Шектүү катары клиниканын анестезиолог-реаниматологу кармалганын ИИМден кабарлашты.
Баңгизаттарды мыйзамсыз жүгүртүүгө каршы күрөшүү кызматы менен Бишкек шаарынын Свердлов РИИБи 1340 ампуладагы күчтүү дары-дармектердин уурдалганын аныкташкан.
Бул факты боюнча Кылмыш-жаза кодексинин 286-беренеси жана 291-беренеси менен кылмыш иши козголгон.
"Ыкчам иликтөөнүн жүрүшүндө 2023-жылдан бери балдар клиникасында анестезиолог-реаниматолог болуп иштеген 1991-жылы туулган К.Т. кызмат абалынан пайдаланып, "Д" аттуу ЖЧКсынын директорунун атынан баңгизатын алууга ишеним каттарды жасалмалап жүргөн. Шектүү каражаттарга түздөн-түз ээ болуу менен жеке колдонуу үчүн баңги жана психотроптук заттарды жашыруун уурдап, ири өлчөмдө зыян келтирген", - дешти министрликтен.
Кармалган адистин аракетине тийиштүү соттук экспертизалардын корутундусу менен укуктук баа берилет. Учурда окуянын бардык жагдайларын аныктоо боюнча тергөө уланууда.
