Акылбек Жапаров телефондорду каттоо маселеси боюнча кеңешме өткөрдү
Акылбек Жапаров уюлдук телефондордун IMEI коддорун Мамлекеттик идентификациялоо системасында (МИС) каттоо маселеси боюнча кеңешме өткөрдү. Бул туурасында Министрлер кабинетинен кабарлашты.
Жыйынга тиешелүү мамлекеттик органдардын, анын ичинде Ички иштер министрлигинин, Мамлекеттик бажы кызматынын жетекчилери катышты.
Акылбек Жапаров жарандардын коопсуздугун камсыздоо жана катталбаган IMEI коддору бар телефондорду мыйзамсыз ташып келүү жана сатуу менен күрөшүү үчүн уюлдук телефондордун IMEI коддорун каттоонун маанилүүлүгүн белгиледи.
Ошону менен бирге министрлер кабинетинин башчысы каттоонун жүрүшү тууралуу маалыматтын жоктугунан жана кызматка кирүүдөгү көйгөйлөрдөн улам жарандардын нааразычылыгы жаралып жатканын белгиледи.
Акылбек Жапаров көтөрүлгөн көйгөйлөрдү чечүү боюнча тиешелүү чараларды көрүүнү тиешелүү жетекчилерге тапшырып, зарыл болгон учурда чечкиндүү чаралар көрүлөрүн, анын ичинде IMEI коддорун каттаган компания менен келишимди бузууга да токтолду.
