Көк бөрү боюнча президенттик кубокту "Ак Илбирс" командасы жеңип кетти
Көк бөрү боюнча Президенттин кубогуна арналган турнирде "Ак Илбирс" командасы жеңишке жетти.
Финалдык оюнда кубок үчүн "Шахтёр" жана "Ак-Илбирс" командалары күч сынашты. Биринчи бөлүктө "Ак-Илбирс" 2 салым салып үстөмдүк кылса, экинчи бөлүктө "Шахтёр" командасы эсепти теңеп кетти. Оюндун үчүнчү бөлүгү 3:3 эсеби менен аяктап, алтын салым үчүн кошумча 10 мүнөт берилди. Жыйынтыгында Бакытбек уулу Кутман алтын салымды салып, "Ак-Илбирске" жеңиш алып келди.
Белгилесек, көк бөрү боюнча Президенттин кубогуна арналган турнир 28-августта Чолпон-Атадагы ат майданда башталган. Турнир Дүйнөлүк көчмөндөр оюндарына байланыштуу бир гана лиганын алкагында, олимпиадалык системанын негизинде өткөрүлдү.
Кубок үчүн жалпы 14 команда (Ак-Суу, Алтын-Альянс, Ак Илбирс, Ысык-Ата, Казарман, Ала-Арча, Талас шаары, Бапа Барскоон, Бийиктик, Ичке-Суу, Асанбек-Ата, Кара-Ой, Шахтёр, Чүй-Токмок) ат салышты.
