Бишкектин вице-мэри: Ысык асфальтты эле эмес, мээни да ээритип жатат
Бишкектин жакында эле оңдолгон жолдорундагы мүчүлүштүктөр боюнча жарандар нааразычылыктарын айта башташты.
Тактап айтканда, Ахунбаев көчөсүндөгү төшөлгөн асфальт ээрип кетти деген арыздар түшүүдө. Сүйөркулов жана Жукеев-Пудовкин көчөлөрүнүн кесилишинде да абал ушундай. Айдоочулардын айтымында, ысык аба ырайында унаа айдаганда да жолдун бетинин текстурасынын айырмасы сезилип, асфальт толкун болуп калды.
Арызга борбор калаанын вице-мэри Жамалбек Ырсалиев жооп берди.
"Азыр асфальт эле эмес, мээбиз да кайнап кетип жатат. Сыртта кандай ысык экенин өз көзүң менен көрүп турасың.
Ахунбаев көчөсүнүн оңдолгон тилкелериндеги мүчүлүштүктөр тууралуу мэр жыйырма күн мурун айткан. Жолдордогу айрым люктар асфальттан чыгып кеткендей", - деди ал.
Ырсалиевдин айтымында, ал подрядчы үч жылдык кепилдик берерин мэрге билдирген. Көчөнүн чуңкур пайда болгон бөлүгү кесилип, жаңы асфальт төшөлөт.
"Люктарды асфальт менен тегиз кылганга аракет кылабыз, бирок кээ бир люктардын тирөөчтөрүн кирпич менен бекемдеп коюшат, бул үчүн сууну жана башка коммуникацияларды өчүрүү керек болгон жолдор жабылмак. Ансыз деле ыңгайсыздыктар көп, анан элестетип көргүлө. Суусуз ысыкта эмне болот", - деп түшүндүрдү вице-мэр.
Эскерте кетсек, мэрия өзү жарандарды оңдолгон жолдордогу мүчүлүштүктөрдү билдирүүгө чакырган.
Капиталдык оңдоп-түзөөдөн өткөн жолдордогу кемчиликтерди байкаган жарандар төмөнкү телефондор аркылуу кабарласа болот:
- Октябрь району - 0708 83 83 23, 0312 53 03 15 (Азамат Осмоналиев);
- Ленин району - 0555 31 21 85, 0312 53 03 15 (Кубаныч Шаршамбеков);
- Биринчи Май району - 0500 50 02 57, 0312 53 03 15 (Бакберген Мамыр уулу);
- Свердлов району - 0707 65 17 17, 0312 53 03 15 (Талант Бөрүбаев).
