Улуттук статистика комитети маянасы кескин жогорулаган тармактарды атады
Компаниянын же уюмдун бир кызматкеринин орточо эмгек акысы 2024-жылдын январында (чакан ишканаларды эсепке албаганда) 33664 сомду түздү. Бул тууралуу Бишкекте өткөн маалымат жыйында Улуттук статистика комитетинин төрагасынын орун басары Бакытбек Шокенов билдирди.
Айтымында, Кыргызстанда орточо эмгек акы 2023-жылдын январь айына салыштырмалуу 12,7%га өскөн.
Эң олуттуу өсүш дүң жана чекене соода тармагында, унааларды жана мотоциклдерди оңдоо - 58,3%, тейлөөнүн башка ишмердүүлүгү - 44%, кыймылсыз мүлк чөйрөсүндөгү операциялар - 35,4% байкалган.
Курулушта эмгек акы 28,5%, тоо-кен тармагында 27,4%, суу менен камсыздоо, таштандыларды тазалоо жана кайра иштетүү тармагында 24,7% өскөн.
Шокенов кошумчалагандай, кесиптик, илимий жана техникалык ишмердүүлүк чөйрөсүндө эмгек акы 23,5%, кайра иштетүү өнөр жайында 17,3%, транспорт жана жүктөрдү сактоо 17% жогорулаган.
