Мароккодогу жер титирөөдөн каза болгондордун саны 2 миңден ашты
Марокконун Ички иштер министрлиги тараткан билдирүүгө ылайык, жекшемби күнү, 10-сентябрда эртең менен Мароккодогу жер титирөөнүн курмандыктарынын саны 2012 адамды түздү, дагы 2059 адам жаракат алды, 1,4 миңден ашуун жабырлануучунун абалы оор.
Курман болгондордун негизги бөлүгү Марракеш шаарында жана жер титирөөнүн эпицентрине жакын жайгашкан беш провинцияда болгон.
Ошол эле учурда, адистердин айтымында, куткаруучулар жетүүгө кыйын аймактарга азырынча жете албай жаткандыктан, каза болгондордун саны көбөйүшү мүмкүн. Марокконун падышасы Мухаммед VI тик учактар жана дрондор аркылуу аман калгандарды издөө жана куткаруу үчүн армиянын издөө-куткаруу топторун мобилизациялады.
6,8 баллдык жер титирөө жума күнү кечинде болгон. Анын очогу, ар кандай булактарга ылайык, 11 кмден 18 кмге чейинки тереңдикте, Марракештен болжол менен 70 км түштүктөгү Атлас тоолорунда болгон. Бул жер титирөө акыркы 120 жылда Мароккодо болгон эң күчтүү жер титирөө болду жана Түндүк Африкада мындай табигый кырсыктар салыштырмалуу сейрек кездешет.
