Жалал-Абадда клубдун алдында эркек киши бычакталган. Шектүү кармалды
Жалал-Абадда адам өлтүрүүгө аракет жасады деген шек менен 19 жаштагы бала кармалды. Бул туурасында редакцияга облустук милициядан кабарлашты.
Маалыматта айтылгандай, 7-сентябрга караган түнү саат 01:40 чамасында Жалал-Абад шаарындагы эс алуу клубдарынын биринин алдында 35 жаштагы жаранга бейтааныш бала бычак менен бир нече жолу сайып, денесине жаракат келтирген. Жабырлануучу Жалал-Абад облустук клиникалык ооруканасынын жандандыруу бөлүмүнө жаткырылган.
Бул факты Кылмыш-жаза кодексинин 37-122-беренесинин негизинде катталып, соттук-медициналык экспертиза дайындалып, кылмыш иши козголгон.
Жалал-Абад ШИИБдин кылмыш иликтөө бөлүмүнүн кызматкерлери тарабынан шектүү катары Сузак районунун Таш-Булак айыл аймагынын тургуну 2004-жылы туулган Б.Б. кармалып, убактылуу кармоочу жайга киргизилди.
Учурда тергөө амалдары улантылууда.
