Ленин району боюнча шайлоо: Үч талапкер укуктары бузулганын билдирди
№26 Ленин бир мандаттуу шайлоо округу боюнча Жогорку Кеңештин депутаттыгына талапкерлер Илгиз Шаменов, Равшан Жээнбеков жана Акыл Айтбаев конституциялык укуктары бузулганын билдиришти. Алардын өкүлдөрү Борбордук шайлоо комиссиясына жана укук коргоо органдарына арыз менен кайрылышкан.
Талапкерлер өз кайрылууларында УТРКнын эфириндеги теледебаттарда башка талапкерлер менен бирге чыгып сүйлөөгө жана жекече сүйлөгөн сөздөрүн жаздырууга мүмкүнчүлүк берүүнү суранышкан. Шаменов камерадагы бардык байланыш каражаттары менен камсыз кылууну жана шайлоочулар менен жолугушууларды өткөрүүгө мүмкүнчүлүк берүүнү суранса, Жээнбеков баш коргоо чарасын үй камагына өзгөртүүнү талап кылган.
"Тергөө органдары арыздарды канааттандыруудан баш тартты", деп билдирди талапкерлердин биринин ыйгарым укуктуу өкүлү Муратбек Солтонбеков Kaktus.media сайтына. Анткени, үчөө тең өзгөчө оор кылмышка айыпталууда, буга байланыштуу алар "камактан качып кетиши мүмкүн".
"Биз БШКнын чечимин сот аркылуу талашууга ниеттенип жатабыз. Мен бүгүн арыз берем", - деди Солтонбеков.
БШК баш коргоо чарасы боюнча маселени чечүү алардын ыйгарым укуктарында эмес, соттун ыйгарым укуктарында экенин билдирген.
Ошону менен бирге Борбордук шайлоо комиссиясы УТРКга бөлүнгөн обо убактысын талапкер Айтбаевге бөлүнгөн бекер обо убактысынын бөлүгүндө "Кыргыз Республикасындагы шайлоолор жөнүндө" мыйзамдын формаларын жана талаптарын колдонуу менен пайдалануу мүмкүнчүлүгүн берүүнү сунуштады.
Эске салсак, №26 Ленин бир мандаттуу шайлоо округу боюнча Жогорку Кеңештин депутаты Жаныбек Абировдун ыйгарым укуктары мөөнөтүнөн мурда токтотулгандыгына байланыштуу Садыр Жапаров мөөнөтүнөн мурда шайлоону 2023-жылдын 28-майында өткөрүү жөнүндө жарлыкка кол койгон.
Борбордук шайлоо комиссиясы шайлоого даярдык көрүү боюнча иш-чаралардын календардык планын бекиткен. Борбордук шайлоо комиссиясына 47 талапкер арыз берип, бирок кийин кайра чакыртып ала башташты. Учурда шайлоого 30 талапкер катышары белгилүү болду.
