Мүмкүнчүлүгү чектелген адамдарга дем бергим келет. Дастан Бекешев Эвересттин базасында
Жогорку Кеңештин депутаты Дастан Бекешев социалдык түйүндөргө Эвересттин базасына саякатта түшкөн сүрөт жана видеосун жарыялады.
Kaktus.media сайтынын редакциясы парламентарийден анын сапары кандай өтүп жатканынан кабар алды.
Анын айтымында, бул альпинизм жана спорттук альпинизм федерациясы менен биргелешкен сапар болгон.
"Мен Эвересттин базасына ден соолугунун мүмкүнчүлүгү чектелген адамдарды жана карапайым адамдарды алдыга максат коюуга мотивациялоо үчүн бардым. Адамдар өз ден соолугу менен активдүү алектенип, максаттарды коюп, ага жетүү керек", - деди Бекешев.
Депутаттын айтымында, ал ден соолугунун мүмкүнчүлүгү чектелген адамдар да максаттарына жете аларын көрсөткүсү келген.
"Кыргызстанда мен буга чейин Рацека, Комсомолец сыяктуу чокуларды багындыргам, азыр Ленин чокусу жөнүндө ойлонуп жатам. Биздин тоолор Непалга караганда шартыбыз бир топ жакшы экендиги менен айырмаланат", - деп түшүндүрдү эл өкүлү.
Бекешев сапарга кыш мезгилинен бери даярдангандыгын жана бул үчүн жашоо образын өзгөрткөнүн кошумчалады.
Депутат азыркы сапарында Эверестти багындырууну көздөбөйт, анткени бул өтө татаал жөө жүрүш.
"Жолдо мен Эверестке бара жаткан азиз адамга жолугуп калдым. Тарыхта үч гана азиз адам эң бийик чокуну багындырган. Бул оор окуя экенин белгилейм", - деп жыйынтыктады ал.
