Ички иштер министрлиги Кыргызстанга унааларды ташып келүү боюнча иш козгоду
Депутат Айбек Осмонов Кыргызстанга сатуу үчүн алып келинген ишкерлердин унаалары Кылмыш иликтөө башкы башкармалыгынын кызматкерлери тарабынан кармалып жатканын билдирген. Бул тууралуу ишкерлер айтышкан.
Жогорку Кеңештин 4-майдагы жыйынында ал унаалар бажыдан өтүп жатканын, бирок бийлик өкүлдөрү аларды вагондон да түшүрбөй жатканын белгилеген. Депутат себебин тактаган.
Ички иштер министринин орун басары Эркебек Аширходжаев 30 унаа алып келүү фактысы боюнча кылмыш иши козголгонун билдирди.
"Алардын бардык VIN-коддору талкаланып, жасалма документтер менен алып келинген. Бул факты боюнча КР Кылмыш-жаза кодексинин 380-беренеси "Унаанын идентификациялык номерин жасалмалоо, жок кылуу" боюнча кылмыш иши козголгон", - дейт.
Ички иштер министринин орун басарынын айтымында, унаалардын көбү Литвадан алынып келинген.
