Президент Балыкчыдагы аскердик техникаларды, куралдарды оңдоо базасына барды
Өлкө башчы Садыр Жапаров Балыкчы шаарында жайгашкан Коргоо министрлигинин Курал-жарак жана аскердик техникасын оңдоо боюнча борбордук базасынын абалы менен таанышты. Президенттин маалымат кызматынан Жапаров аталган борборго бүгүн, 2-мартта барганын кабарлашты.
Белгилүү болгондой, аталган база 2022-жылдын октябрь айында ачылган. Анда курал-жарактарды жана аскердик техниканы максатына жараша колдонууга даярдоо үчүн комплекстүү техникалык тейлөө жана учурдагы оңдоо иштери жүргүзүлөт.
2023-2024-жылдарга базанын аймагын кеңейтүү, зооттолгон танкалык техниканы сактоочу жайларды куруу, аны оңдоо үчүн кошумча жабдууларды орнотуу, коопсуздук тутумун чыңдоо жана башка көп нерселер пландалып жатканы маалымдалды.
Мамлекет башчы курал-жарактын, аскердик жана атайын техниканын, жабдыктардын жана формалык кийимдердин үлгүлөрү менен таанышты, ошондой эле айлана-тегеректеги шарттардан көз каранды болбогон медициналык жардам көрсөтүү үчүн зарыл дарылоо жабдуулар менен жабдылган мобилдик аскердик талаа госпиталын карап чыкты.
Президент Садыр Жапаров өлкөнүн коргонуу жөндөмдүүлүгүн бекемдөө зарылдыгын белгилеп, Куралдуу күчтөрдүн материалдык-техникалык базасын чыңдоого багытталган бир катар тапшырмаларды берди.
